Skýrsla um íslenska ferðaþjónustu 2018
Íslensk ferðaþjónusta mun á þessu ári halda áfram að auka umfang sitt í hagkerfinu og styrkjast sem máttarstólpi í íslensku samfélagi. Vöxtur ferðaþjónustunnar hefur krafist mikilla fjárfestinga sem hefur reynst sjálfstæð uppspretta hagvaxtar og aukinnar atvinnu hér á landi. Engu að síður hefur fjárfesting í gistiþjónustu ekki mætt eftirspurn ferðamanna eftir gistingu að öllu leyti. Hefur það leitt til þess að nýting hótelherbergja er því með hæsta móti hér á landi í alþjóðlegum samanburði og gisting í Reykjavík orðin ein sú dýrasta á Norðurlöndum. Þá sýna tölurnar að deilihagkerfið hefur leikið mikilvægt hlutverk í að gera þeim fjölda ferðamanna sem hingað hefur ferðast á undanförnum árum kleift að dvelja á landinu. Nú er svo komið að deilihagkerfið stefnir í að verða umfangsmeira en öll hótel á landinu til samans þegar kemur að gistingu ferðamanna hér á landi.
Áhugaverðar staðreyndir úr skýrslunni
Langstærstur hluti ferðamanna á Íslandi kemur frá Bandaríkjunum – þeir eyða líka mest allra ferðamanna.
Ísland er einn dýrasti ferðamannastaður heims – verðlag er að meðaltali 28% hærra hér en á hinum Norðurlöndunum.
Airbnb velti í kringum 20 milljörðum króna árið 2017 – það er 109% aukning frá árinu áður.
Árið 2018 munu að öllum líkindum meira en 570 milljarðar króna rata í ríkiskassann sem beinar gjaldeyristekjur af ferðaþjónustu – það er um 10% tekjuvöxtur.
Ísland er í 25. sæti yfir samkeppnishæfustu þjóðirnar í ferðaþjónustu – þá eru vinnumarkaður og hæfni vinnuafls metið það samkeppnishæfasta í heiminum.
Airbnb nálgast hótelin óðfluga hér á landi – nú þegar er rekstur Airbnb á Íslandi orðinn þrisvar sinnum umfangsmeiri en öll gistiheimili landsins.
Upptaka frá fundi
Upptaka frá fundi Íslandsbanka um íslenska ferðaþjónustu 2018 þar sem að Bjarnólfur Lárusson, viðskiptastjóri í Verslun og þjónustu og Elvar Orri Hreinsson, sérfræðingur í Samskiptum og greiningu hjá Íslandsbanka kynna helstu atriði nýrrar skýrslu Íslandsbanka um íslenska ferðaþjónustu.
Pallborðsumræður um stöðu ferðaþjónustunnar og það sem framundan er:
- Davíð Torfi Ólafsson, framkvæmdastjóri Íslandshótela
- Grímur Sæmundsen, forstjóri Bláa lónsins
- Kristín Hrönn Guðmundsdóttir, forstöðumaður Verslunar og þjónustu hjá Íslandsbanka
- Rannveig Grétarsdóttir, eigandi og framkvæmdastjóri Eldingar
- Þórdís Kolbrún R. Gylfadóttir, ferðamála-, iðnaðar og nýsköpunarráðherra
Umræða um íslenska gistiþjónustu
Í tilefni útgáfu skýrslu íslandsbanka um íslenska ferðaþjónustu 2018 mættu góðir gestir í Norðurturninn til Björns Berg. Þau Ásberg Jónsson, forstjóri Nordic Visitor, Elvar Orri Hreinsson, Greiningu Íslandsbanka, Frans Veigar Garðarsson, Samtökum um skammtímaleigu og Magnea Þórey Hjálmarsdóttir, framkvæmdarstjóri Icelandair hótela.