Íslandssjóðir í samstarf við First Hotels

16.12.2016

Skandinavíska hótelkeðjan First Hotels og FAST-3, fagfjárfestasjóður í stýringu Íslandssjóða, hafa gengið til samstarfs um opnun hótels undir merkjum First Hotels í Hlíðasmára í Kópavogi á næsta ári.

Yfir 90 hótel eru starfrækt undir merkjum First Hotels víðsvegar í Skandinavíu en félagið var stofnað árið 1993 og er með höfuðstöðvar sínar í Osló. Félagið hyggur á opnun fleiri hótela á Íslandi á næstu misserum.

Hótelið í Hlíðasmára verður nútímalegt og hagkvæmt og mun First Hotels nýta sér nýjustu tæknilausnir og sjálfvirkni í gestaþjónustu. Mikil atvinnuuppbygging hefur átt sér stað við Smáralind en á næstu árum eru uppi áætlanir um nýja íbúðabyggð í bland við verslun og þjónustu.

Framkvæmdir eru hafnar og er yfirumsjón framkvæmda í höndum Capex Consult en áætlað er að hótelið taki á móti fyrstu gestum sínum í árslok 2017.

Kjartan Smári Höskuldsson, framkvæmdastjóri Íslandssjóða:
"Samstarf við First Hotels er mjög spennandi og stór áfangi að ná samningi við erlenda hótelkeðju um þessa viðbót í hótelflóruna á höfuðborgarsvæðinu. Það er jákvætt að sjá dreifingu gistirýma á höfuðborgarsvæðinu sem getur mætt hraðri fjölgun ferðamanna til landsins. Ljóst er að frekari fjárfestinga er þörf og ánægjulegt að geta boðið viðskiptavinum okkar að taka þátt í þeirri uppbyggingu með okkur."

Til baka