Um Íslandssjóði

Íslandssjóðir hf. er elsta sjóðastýringarfyrirtæki á Íslandi, upprunalega stofnað árið 1994 og er í eigu Íslandsbanka. Félagið stýrir 26 verðbréfa- og fjárfestingasjóðum, tveimur fagfjárfestasjóðum og þjónustar auk þess fjárfestingarfélög sem fjárfesta í óskráðum hlutabréfum og fasteignum. Íslandssjóðir stýra eignum sem nema um 150 milljörðum króna og yfir 10.000 sparifjáreigendur og fjárfestar hafa valið að ávaxta eignir sínar í sjóðum félagsins.


Félagið starfrækir úrval hlutabréfasjóða og blandaðra sjóða og er stærst í rekstri skuldabréfasjóða á Íslandi bæði þegar horft er til fjölda sjóða og eigna í stýringu. Íslandssjóðir hafa auk þess sérhæft sig í fasteignasjóðum og framtakssjóðum og rekur félagið nú tvo sjóði í hvorum eignaflokki. 

 

Íslandssjóðir hafa árlega frá árinu 2013 hlotið viðurkenningu sem fyrirmyndarfyrirtæki í góðum stjórnarháttum frá Rannsóknarmiðstöð um stjórnarhætti.

 

Íslandssjóðir er sjálfstætt starfandi fjármálafyrirtæki og starfar á grundvelli laga um fjármálafyrirtæki nr. 161/2002 og laga um verðbréfasjóði, fjárfestingarsjóði og fagfjárfestasjóði nr. 128/2011. Allir stjórnarmenn félagsins eru óháðir.

 

Hjá Íslandssjóðum starfa 15 sérfræðingar með áralanga starfsreynslu á fjármálamarkaði að meðaltali. Framkvæmdastjóri félagsins er Kjartan Smári Höskuldsson og formaður stjórnar er Tanya Zharov.