Upplýsingagjöf tengd sjálfbærni á sviði fjármálaþjónustu

Reglugerð ESB um upplýsingagjöf tengda sjálfbærni á sviði fjármálaþjónustu (hér eftir „SFDR“ ) var innleidd hérlendis með lögum nr. 25/2023 um upplýsingagjöf á sviði fjármálaþjónustu og flokkunarkerfi fyrir sjálfbærar fjárfestingar og tók gildi 1. júní 2023. Í reglugerðinni er gerð krafa um að aðilar á fjármálamarkaði, líkt og Íslandssjóðir, birti upplýsingar til fjárfesta að því er varðar hvernig áhætta tengd sjálfbærni er felld inn, hvernig tekið er tillit til neikvæðra áhrifa á sjálfbærni, eflingu umhverfislegra eða félagslegra þátta og sjálfbærar fjárfestingar.

Gagnsæi í áhættustefnu um sjálfbærni
Samkvæmt 3. gr. SFDR ber aðilum á fjármálamarkaði að birta á vefsetrum sínum upplýsingar um stefnur sínar um hvernig áhætta tengd sjálfbærni er felld inn í fjárfestingarákvarðanatökuferli þeirra. Íslandssjóðir hafa markað stefnu sem gildir um fjárfestingarákvörðunartökuferli á sviði sjóðastýringar og eignastýringar innan Íslandssjóða. Með sjálfbærniáhættu er átt við atburð eða ástand á sviði umhverfismála, félagsmála eða stjórnarhátta sem gæti, ef hann gerist, haft raunveruleg eða hugsanleg veruleg neikvæð áhrif á virði fjárfestingarinnar.

Stefna um sjálfbærniáhættu í fjárfestingarákvörðunartökuferli (PDF)

Ekki er tekið tillit til helstu neikvæðra áhrifa fjárfestingarákvarðana á sjálfbærniþætti á einingastigi

Íslandssjóðir taka að svo stöddu ekki tillit til helstu neikvæðu áhrifa fjárfestingarákvarðana á sjálfbærniþætti á einingastigi, sbr. 1. mgr. 4. gr. SFDR. Af þeim sökum birta Íslandssjóðir ekki þær upplýsingar sem kveðið er á um í a-lið ákvæðisins.

Ákvörðunin byggist á því að upplýsingagjöf útgefenda og gæði fyrirliggjandi gagna eru enn sem komið er takmörkuð og í sumum tilvikum ófullnægjandi. Það er því mat Íslandssjóða að niðurstöður slíks mats yrðu að svo stöddu ekki nægilega áreiðanlegar til að gagnast fjárfestum eða nýtast við töku fjárfestingarákvarðana.

Íslandssjóðir fylgja stefnu um ábyrgar fjárfestingar þar sem lögð er áhersla á að umhverfislegir og félagslegir þættir og stjórnarhættir (UFS-þættir) séu hluti af greiningarferli fjárfestinga. Þótt félagið taki ekki tillit til neikvæðra áhrifa fjárfestingarákvarðana á sjálfbærniþætti í skilningi 4. gr. SFDR leggur það áfram mat á UFS-þætti í fjárfestingarferli sínu.

Íslandssjóðir munu endurmeta eftir þörfum hvort tilefni sé til að taka tillit til neikvæðra áhrifa fjárfestingarákvarðana á sjálfbærniþætti á einingastigi. Slíkt endurmat ræðst meðal annars af því hvort upplýsingagjöf og gagnagæði aukist.

Tillit til neikvæðra áhrifa á sjálfbærni á stigi fjármálaafurða (sjóða)

Með hliðsjón af einkennum þeirra sjóða sem eru í rekstri félagsins hverju sinni og einkum hjá þeim sjóðum sem eru með „sjálfbæra fjárfestingu“ sem sérstakt fjárfestingarmarkmið eða sérstakt markmið um að efla „umhverfis- eða félagslega þætti“ munu Íslandssjóðir ákveða og birta hvort, og að hvaða leyti, tillit sé tekið til neikvæðra áhrifa fjárfestingarákvarðana á stigi fjármálaafurða.

Í tengslum við sjóði í rekstri Íslandssjóða, þar sem ekki er tekið gagngert fram að markmið þeirra sé að efla umhverfis- eða félagslega þætti eða að hafi sjálfbæra fjárfestingu að markmiði, munu Íslandssjóðir ekki taka tillit til neikvæðra áhrifa fjárfestinga á sjálfbærni.

Í tengslum við sjóði í rekstri Íslandssjóða sem hafa sérstakt markmið um að efla umhverfis- eða félagslega þætti eða hafa sjálfbæra fjárfestingu að markmiði þá munu Íslandssjóðir taka tillit til neikvæðra áhrifa á sjálfbærni að því marki sem lýst er í útboðslýsingu viðkomandi sjóðs og birta helstu upplýsingar um áhrifin í ársreikningi viðkomandi sjóðs. 

Í öllum tilfellum vísast til útboðslýsingar viðkomandi sjóðs varðandi hvaða tiltekna stefna á þessu sviði á við um sjóðinn.

Gagnsæi starfskjarastefnu í tengslum við hvernig áhætta tengd sjálfbærni er felld inn

Samkvæmt 5. gr. SFDR ber aðilum á fjármálamarkaði og fjármálaráðgjöfum skylda að birta upplýsingar um hvernig áhætta tengd sjálfbærni sé felld inn í starfskjarastefnu félaga.

Starfskjarastefna Íslandssjóða er uppfærð árlega og er markmið hennar að gera starf hjá félaginu að eftirsóknarverðum kosti fyrir hæft starfsfólk og þar með tryggja samkeppnishæfni félagsins, framþróun, viðunandi arðsemi félagsins sem og árangur sjóða og eignasafna í stýringu þess.

Með starfskjarastefnunni er reynt að tryggja að starfskjör starfsmanna samræmist og stuðli að traustri og skilvirkri áhættustýringu og hvetji ekki til áhættusækni sem er í ósamræmi við áhættusnið eða reglur þeirra sjóða sem Íslandssjóðir reka eða dragi úr möguleikum félagsins til að starfa með hagsmuni sjóða sem það rekur að leiðarljósi sem og hagsmuni eignasafna í stýringu félagsins. Áhætta tengd sjálfbærni er ekki undanskilin í því sambandi. Jafnframt að starfskjör starfsmanna samræmist viðskiptaáætlun, markmiðum, gildum og hagsmunum Íslandssjóða og sjóða sem félagið rekur og fjárfesta í þeim sjóðum og leiði ekki til hagsmunaárekstra.

Starfskjarastefna (PDF)