Akur fjárfestingar, framtakssjóður í rekstri Íslandssjóða, hefur keypt 30% hlut í Fáfni Offshore hf. Fjárfestingin nemur 1.260 milljónum króna. Félagið sérhæfir sig í þjónustu við olíu-og gasborpalla auk annarra verkefna á norðlægum slóðum. Fyrsta skip félagsins Polarsyssel var afhent félaginu í september sl. Það er fyrsta íslenska sérhæfða skipið sem er til öryggis- og olíuþjónustu á Norðurslóðum. Skipið hefur verið til þjónustu við Sýslumanninn á Svalbarða. Fáfnir Offshore hefur gert 6 ára þjónustusamning við sýslumanninn um gæslustörf í sex mánuði á ári. Þá hefur Fáfnir einnig gengið frá samningum við stærsta fyrirtæki Rússland Gazprom um þjónustu við olíuborpall í eigu félagsins sem er staðsettur í Pechora hafinu.

Hlutafjáraukningunni í Fáfni Offshore er ætlað að styðja við frekari vöxt félagsins. Fáfnir Offshore hefur fest kaup á öðru skipi sambærilegrar gerðar og Polarsyssel sem nú er í smíðum og verður það afhent um mitt ár 2015. Stefnt er á frekari fjárfestingar en Akur er nú stærsti einstaki hluthafi félagsins en næst stærsti hluthafi félagsins er framtakssjóðurinn Horn II.

Jóhannes Hauksson, framkvæmdastjóri Akurs fjárfestinga:

“Við teljum fjárfestinguna í Fáfni Offshore fela í sér spennandi tækifæri til uppbyggingar í atvinnugrein sem er þróuð á alþjóðavísu en ný á Íslandi. Þetta hefur farið afar vel af stað og við trúum því að reynsla Steingríms og annarra hluthafa félagsins eigi eftir að nýtast vel við uppbyggingu félagsins.“

Steingrímur Bjarni Erlingsson, forstjóri Fáfnis Offshore:

„Ég fagna aðkomu Akurs að félaginu hún gerir félaginu kleift að ráðast í þær fjárfestingar sem eru nauðsynlegar til að fylgja eftir þeirri stefnu sem félaginu hefur verið mörkuð. Fyrstu mánuðir Polarsyssel hafa farið vel af stað. Við höfum náð góðum samningum við bæði fyrirtæki og stjórnsýslustofnanir. Við höfum því fulla trú á að nýjar fjárfestingar muni færa okkur enn fleiri og betri tækifæri.“

Um Akur fjárfestingar

Akur fjárfestir í óskráðum félögum. Hluthafar í félaginu eru 15 talsins þar af 13 lífeyrissjóðir ásamt VÍS og  Íslandsbanka.  Fjárfestingin í Fáfni Offshore er önnur fjárfesting Akurs og sú stærsta hingað til en félagið fjárfesti fyrr á þessu ári í HSV eignarhaldsfélagi sem á rúmlega þriðjungshlut í HS veitum. Fjárfestingartími Akurs er þrjú til fjögur ár en áætlaður líftími sjóðsins er átta til tíu ár og er fjárfestingagesta félagsins 7,3 milljarðar.